Analisti politik Skënder Minxhozi deklaroi në një emision televiziv se opozita zyrtare ndodhet në një situatë të vështirë, pasi tre liderët kryesorë të saj janë ose në burg, ose të pandehur. Ai theksoi se kjo përbën një goditje të rëndë për opozitën, veçanërisht në kohë fushate elektorale.
“Mjafton të kujtojmë që sot opozita zyrtare tre krerët e saj i ka ose në burg ose të pandehur. Nuk ka goditje më të madhe, aq më tepër në kohë fushate. Madje njëri prej tyre ka ‘non grata’ dhe në Britani dhe në SHBA,” u shpreh Minxhozi, duke iu referuar Sali Berishës.
Ai gjithashtu përmendi edhe arrestimin e Ilir Metës dhe tha se të tre krerët e opozitës janë të implikuar në shkelje, duke shtuar se problematika nuk qëndron vetëm në raportet me ndërkombëtarët, por me votuesit shqiptarë.
“Problemin nuk e ka me Amerikën Berisha, e ka me votuesit shqiptar. Duhet të themi që të tre krerët e opozitës janë të implikuar në shkelje. Rama nuk është vetë i implikuar. Ke Berishën dhe Metën poshtë partive të tyre respektive dhe ke Ramën sipër partisë së tij respektive,” përfundoi analisti.