Kryeministri Edi Rama ka zhvilluar një takim me të rinjtë që kanë kryer kursin e kodimit, duke folur për rëndësinë e teknologjisë dhe inovacionit.
Ai u shpreh se është shumë e rëndësishme që teknologjia të ketë më shumë vëmendje dhe hapësirë. Sot, siç tha Rama janë 340 laboratorë inteligjentë në shkolla.
‘Plani është që të arrijmë 1000 laboratorë inteligjentë. Është drejt përfundimit një tjetër strukturë në Vlorë, aty ku ka qenë një ngrehinë shumë e vjetër…dhe që sot po transformohet në një infrastrukturë dhe funksion të këtij sistemi. Po përpiqemi të zgjerohemi edhe në disa qytete të tjera. Te Piramida, për pak ditë, besoj në mesin e majit është planifikuar të hapim një tjetër strukturë bashkë me presidentin e Francës, një shkollë tërësisht ndryshe nga shkollat tradicionale. Ku do t’i jepet mundësia të gjithëve, që të konkurrojnë për të hyrë në atë shkollë me një program specifik dhe inovativ. Ju jepet çelësi për të hyrën në botën e teknologjisë”, tha Rama.
Më tej kryeministri u shpreh se bota e re e teknologjisë i ka dhënë mundësi shumë njerëzve të përshtaten dhe të ndryshojnë profil.
“Ne po bëjmë çmos që të ndjekim kohën dhe t’u rrimë pranë të rinjve, që kanë talent, vullnet e dëshirë”, u shpreh ai.