Sali Berisha zhvilloi këtë të dielë takimin përmbyllës elektoral në Tropojë të koalicionit “Aleanca për Shqipërinë Madhështore” për zgjedhjet e 11 majit. I pranishëm në takim ishte ish truproja i tij, Sali Lushaj. Kreu i PD, tha se qeveritarët janë vite larg halleve të këtij vendi.
“Tradita jonë është atdhedashuria. Të dashur miq, Tropoja në një të shkuar jo të largët është djegur dhe është përvëluar brenda një harku kohor të shkurtër disa herë. Tropojasit janë shpërngulur në zona të tjera, por janë kthyer me shpresën më të madhe, kanë ndërtuar shtëpitë e tyre.
Këta qeveritarë që janë vite dritë larg jush, larg halleve tuaja, larg problemeve tuaja, larg jetës suaj, nuk duan t’ia dinë për ju. I keni dëgjuar, besoj, një shprehje që vjen nga thellësitë e kohërave, sipas së cilës “këtu nuk vdes njeri për bukë”.
Vërtet nuk vdiste njeri për bukë, se njerëzit ndanin kafshatën me njëri-tjetrin, por qeveritarë, ministra që thonë se “nuk vdes njeri për bukë”, nuk ka fjalë që nuk meritojnë t’u thuhen”.