Komisioneri Shtetëror i Zgjedhjeve, Ilirjan Celibashi i bën thirrje zgjedhësve nga Diaspora që nuk janë kontaktuar nga kompania postare DHL me email apo sms, të kontaktojnë me shërbimin postar në vendin ku ata jetojnë që të informohen mbi dërgesën postare që përmban zarfin me fletën e votimit nga KQZ.
Sipas tij, mungesa e njoftimit apo kontaktimit nga DHL vjen për shkak të problemeve me adresën e deklaruar. ”Të gjithë ata zgjedhës nga jashtë, kudo në botë, por veçanërisht ata në Greqi, të cilët deri më sot nuk kanë marrë njoftim dhe/ose nuk janë kontaktuar nga DHL, qoftë nëpërmjet e-mailit apo nëpërmjet SMS-it, janë të lutur të kontaktojnë me shërbimin e DHL në vendin ku jetojnë, për t’u informuar mbi dërgesën postare nga KQZ”, shkruan Celibashi në rrjetet sociale.
Në KQZ kanë mbërritur 144 783 zarfe zgjedhore. Greqia mbetet ende problematikë pasi kanë ardhur deri më tani vetëm 23 640 zarfe nga 68 380 të dërguara në total.