Mbrëmjen e sotme ka mbërritur në Tiranë dhe presidenti i Ukrainës Volodymyr Zelensky, i cili do të jetë pjesë e tryezës së liderve evropianë, që do të mblidhen në Samitin Evropian të BE, më 16 maj në kryeqytet.
Vendi ynë mirëpreti sot në Tiranë një sërë liderësh të rëndësishëm evropianë në kuadër të Samitit të Komunitetit Politik Europian, që zhvillohet për herë të parë në Shqipëri.
Pritja zyrtare u zhvillua në Aeroportin Ndërkombëtar “Nënë Tereza”, ku përfaqësues të lartë të shtetit shqiptar mirëpritën personalitete të larta ndërkombëtare.
Ministri Blendi Gonxhja, konfirmoi ardhjen e një sërë figurash të njohura si Presidenti i Ukrainës, Volodymyr Zelenskyy, Kryeministri i Hollandës, Dick Schoof, Presidentja e Parlamentit Europian, Roberta Metsola si dhe Presidentja e Moldavisë, Maia Sandu.
Në të njëjtën ditë mbërriti edhe Sekretari i Përgjithshëm i NATO-s, Mark Rutte, në vizitën e tij të parë në Shqipëri në këtë detyrë.
Ministri i Mbrojtjes Pirro Vengu, e cilësoi ardhjen e tij si “një dëshmi e qartë e rolit të shtuar të Shqipërisë në Aleancën e Atlantikut të Veriut”.