Partia Socialiste siguroi 9 mandate në qarkun e Vlorës, duke i rrëmbyer opozitës edhe një vend nga lista e sigurt. Ardit Bido, një nga më të votuarit në listën e hapur të PS-së, deklaroi në një intervistë televizive se kjo fitore e thellë është rezultat i mobilizimit qytetar, i punës së strukturave dhe takimeve të zhvilluara gjatë fushatës, përfshirë edhe vizitat e kryeministrit Edi Rama në Greqi.
“Mandati i nëntë nuk erdhi vetëm nga diaspora, por nga pjesëmarrja masive e qytetarëve që votojnë në qarkun e Vlorës. Kjo është meritë e përpjekjeve tona gjatë katër viteve dhe frymës që krijoi qeveria për një mandat të ri”, tha Bido.
I pyetur për problemet me votën e diasporës, sidomos në Greqi, Bido pranoi se kishte pasur çrregullime për shkak të shërbimit postar, por gjithçka përfundoi normalisht: “Në fund u shpreh vullneti i tyre, që solli fitoren e thellë të PS-së në qark”.
Sa i takon akuzave të opozitës për vjedhje votash dhe lidhje me banda kriminale, Bido i cilësoi si pretendime të pabazuara:
“Të gjithë kanë të drejtë të votojnë dhe të ndikojnë, por të lidhësh PS me organizata kriminale nuk qëndron. Për fushatën time, askush nuk mund të thotë se ndërhyri dikush apo e bëri dikush tjetër”.
Bido i drejtoi edhe një mesazh kritikuesve të tij politikë në Himarë, duke theksuar se në zgjedhjet e ardhshme lokale ata do të përballen me një humbje edhe më të thellë:
“Humbësi në Himarë do marrë edhe një humbje më të madhe. Banorët e Himarës nuk u besojnë këtyre teorizimeve. Jam përfaqësues i të gjithë atyre që më votuan, përfshirë edhe 400 banorë të Himarës dhe do të jenë më shumë në të ardhmen”.
I pyetur nëse mazhoranca me shumicë të cilësuar prej 83 mandatesh përbën një rrezik, Bido tha:
“Në parim, një shumicë e tillë mund të jetë problematike, por qytetarët na dhanë një mandat të qartë për të përmbushur objektivat madhore si integrimi në Bashkimin Evropian”.