Plazhet në Rivierën Shqiptare po bëhen gjithnjë e më të populluara, por nëse shkoni më në brendësi të vendit, do të zbuloni fshatra të qetë, lumenj të egër dhe aventura të pazakonta. Kështu shkruhet në një artikull të botuar në të përditshmen britanike The Times nga Laura Sanders, e cila përjetoi një udhëtim fantastik 7-ditor në jug të Shqipërisë.
Ajo përshkruan turin e saj të zhvilluar në maj, ku thotë se ka zbuluar disa nga thesaret më pak të njohura të jugut të Shqipërisë. Shqipëria rekomandohet si një eksperiencë unike, nëse eksploron bregdetin e Qeparoit, Dhërmiut, Borshit, Sarandës e Ksamilit, përpara se të zhytesh në brendësi të vendit.
Shkrimi përshkruan vendet e trashëgimisë botërore të UNESCO-s, Butrintin dhe Gjirokastrën, ndërsa më pas grupi i udhëtarëve ka shijuar ujëvarat e fshehura, ka qëndruar në ferma në male dhe ka bërë rafting në Vjosë, një nga lumenjtë e fundit të egër të Evropës.
Përveç pamjes piktoreske, Shqipëria vlerësohet edhe për mikpritjen dhe kulinarinë e veçantë. Rrëfimi i gazetares britanike mbyllet në Liqenin e Ohrit, ku qëndruan në fshatin e qetë të Linit dhe më pas përshkuan me biçikletë zonën e liqenit drejt Pogradecit.
Shqipëria rekomandohet si vendi ideal nëse po kërkoni të përjetoni pushime autentike me aventura në natyrë dhe trashëgimi kulturore.