Një emigrant i jashtëligjshëm shqiptar ndodhet pas hekurave, pasi akuzohet se kujdesej për një fabrikë kanabisi në rrethinat e York të Anglisë.
26-vjeçari L. Zenelaj pretendoi para autoriteteve britanike se ishte trafikuar nga Shqipëria dhe ishte detyruar të punonte në këtë fabrikë.
Por pasi gjykata u njoh me faktin se gjatë kohës që kujdesej për kanabisin, 26-vjeçari udhëtonte për qejf së bashku me të dashurën e tij nëpër Angli, trupa gjykuese hodhi poshtë pretendimet e tij për skllavëri moderne dhe e shpalli fajtor.
Prokurori David Ward tha se policia kishte gjetur 49 bimë kanabisi, së bashku me pajisjet e nevojshme për kultivimin e drogës në fabrikën në fjalë, gjatë një operacioni të zhvilluar në nëntor të 2018-s.
Ata gjetën gjithashtu 320 paund kesh, një telefon në të cilin ndodhej një video e Zenelajt duke numëruar paratë, si dhe dokumente identifikimi false, rumune e italiane.
Gjatë mbrojtjes së tij, Zenelaj tha se kishte qenë 21 vjeç kur kishte vendosur të emigronte drejt Britanisë.
Ai tha se një person me nofkën “Ujku” i kishte siguruar atij dokumente false dhe udhëtimin drejt këtij shteti në këmbim të 6 mijë eurove.
26-vjeçari tregoi se për të shkuar në Britani kishte përdorur dokumentin e identifikimit rumun dhe se kishte udhëtuar për 1 muaj me autobus e kamion, duke përshkuar 6 shtete, para se të mbërrinte në destinacion.
Para gjykatës shqiptari deklaroi se organizatorët e kishin detyruar që të punonte në fabrikën e kanabisit, duke e kërcënuar atë dhe familjen e tij.
Megjithatë, në fund pretendimet e tij nuk u pranuan nga gjykata dhe dënimi për të riun pritet të jepet në fund të muajit.