Vendimi i Federatës Serbe të Futbollit, që ndeshjet kualifikuese me Anglinë dhe Shqipërinë të luhen në Beograd, nuk është pritur mirë nga Aleksandar Vuçiç. Presidenti serb kritikoi zgjedhjen e FSS, pasi përballja e 9 Shtatorit kundër anglezëve, fillimisht ishte planifikuar të luhej në Leskovac.
“Federata e Futbollit dhe të tjerët nuk arrijnë të përballojnë as 5 minuta presion nga Ambasada Angleze apo palë të tjera, që kërkuan zhvillimin e ndeshjes në Beograd. Pas dy ditëve presion, ata ndryshuan stadiumin, edhe pse ishte vendosur të luhej në Leskovac.
Njerëzit e Leskovacit nuk kanë më pak vlerë se ata në Beograd. Madje, mendoj që edhe pse do të vijë Anglia, në stadiumin Marakana do të ketë vetëm 300 tifozë, sepse Beogradi nuk do t’ia dijë”.
Vuçiç theksoi se nuk i ishte përgjigjur të paktën dhjetë kërkesave nga ambasadat, për ndryshimin e qytetit të ndeshjes.