Zv/kryeministrja dhe njëherësh ministrja e Infrastrukturës dhe Energjisë, Belinda Balluku, ka deklaruar se puna në kantierët strategjikë të infrastrukturës vijon pa ndërprerje, edhe gjatë fundjavave.
Ajo ka ndarë pamje nga puna intensive që po zhvillohet në lotin 7 të segmentit Elbasan–Qafë Thanë, pjesë e Korridorit të rëndësishëm ndërkombëtar VIII. Ministrja theksoi se në këtë segment po punohet për ndërtimin e veprave inxhinierike, si bokse betoni dhe nënkalime, duke e cilësuar kantierin si një ndër më të avancuarit në kuadër të fazës së parë të punimeve.
Korridori VIII pritet të ketë një impakt të rëndësishëm në zhvillimin ekonomik dhe tregtar të rajonit, përfshirë edhe funksionimin e Portit të Porto Romanos, i cili do të kthehet në një pikë kyçe logjistike që do t’i shërbejë edhe Maqedonisë së Veriut.