Gentiana Hudhra u vra më 14 qershor 2025 në Tolentino nga ish-bashkëshorti i saj, Nikollaq Hudhra, 55 vjeç. Ekspertiza mjeko-ligjore e kryer nga doktori Antonio Tombolini në morgun e spitalit të Maceratas konfirmoi se Gentiana ishte goditur 17 herë me thikë në pjesë të ndryshme të trupit, përfshirë kokën, shpinën dhe fytin, duke shkaktuar vdekjen e menjëhershme.
45-vjeçarja shqiptare punonte si kujdestare në Itali, dhe ngjarja tronditi thellë komunitetin vendas. Pas vrasjes, Nikollaq Hudhra u arrestua menjëherë dhe u përball dje në gjykatën e Maceratas për konfirmimin e arrestimit. Ai u shfaq në video-lidhje nga burgu i Montacutos dhe iu përgjigj pyetjeve të gjyqtares Daniela Bellesi, i mbrojtur nga avokatja Lucia Testarmata.
Sipas tij, sëmundjet e shumta dhe stresi i shkaktuar prej ish-gruas ishin shkaku i gjendjes së tij psikologjike. Ai ka ndjekur edhe trajtim psikiatrik në vitin 2021, një vizitë që i ishte rekomanduar nga mjeku i qendrës së konsultimit gjatë ndarjes. Ai posedon dokumentacionin mjekësor, i cili do të shqyrtohet nga prokuroria.