Tirana është në kërkim të një trajneri, ndërsa ka zyrtarizuar largimin e Bledi Shkëmbit. Me një njoftim në rrjetet sociale, klubi i dha lamtumirën teknikut të sezonit të shkuar.
“Klubi i Futbollit Tirana njofton përfundimin e bashkëpunimit me trajnerin Bledi Shkëmbi. Pas një marrëveshjeje të ndërsjellë, palët kanë vendosur të mbyllin bashkëpunimin profesional. KF Tirana shpreh mirënjohjen e saj për kontributin, përkushtimin dhe profesionalizmin e treguar nga z. Shkëmbi gjatë periudhës në drejtimin e skuadrës dhe i uron atij suksese të mëtejshme në karrierën e tij”, shkruante klubi.
Pra, më 19 qershor mbyllet një epokë, për t’u hapur një tjetër.
TRAJNERI I RI – Numri një i bardhebluve Refik Halili i kontaktuar nga gazeta pranoi se ndarja ka ndodhur, ndërsa tani ai beson se do të ketë një emër surprizë.
“Di të them që trajneri do të jetë surprizë, por nuk e kam vendosur”. Një frazë që mban me shpresë tifozërinë bardheblu, por nga ana tjetër i intrigon të gjithë. Halili konfirmoi se do të ketë merkato me emra të fortë, por edhe kjo duhet të vërtetohet. Gjithsesi, Tirana, në këtë moment që flasim, është pa trajner dhe kohën e ka të limituar.
SHKËMBI – Bledi Shkëmbi nuk është më trajner i Tiranës. Ai ka arritur akordin me Strugën dhe zyrtarizimi është vetëm çështje kohe. Korçari ka udhëtuar drejt Strugës për të finalizuar marrëveshjen. Ndihmës i Shkëmbit do të jetë Sabien Lilaj, teksa pjesa tjetër e stafit teknik mbetet e pandryshuar. Ai do të jetë pasues i Ilço Gjorgjioskit, që u largua pas përfundimit të sezonit. “Panorama Sport” mëson ndërkohë se Shkëmbi ka po ashtu ofertë nga Gjilani. Mbetet për t’u parë zgjedhja përfundimtare, ndërsa Struga shfaqet në “pole position”.
EMRAT – Të shumtë janë emrat që qarkullojnë për të marrë drejtimin e Tiranës, por asnjë nuk ka dalë në sipërfaqe. Gjithsesi, Halili, me shumë mundësi, do të zyrtarizojë një emër maksimumi deri të dielën. Opsionet në tavolinën e Halilit janë disa, i takon atij që të vendosë për të ardhmen.
