Dhjetëra banorë të Njësisë Administrative Suç, bashkia Klos, kanë kundërshtuar ndërtimin e një HEC-i në këtë zonë, sepse sipas tyre kjo sjellë probleme serioze për ujin e pijshëm dhe ujitës.
Banorët u shprehën se ata kanë nevojë për ndërtimin e veprave vaditëse dhe jo të HEC-it, i cili than tokat e “Hambarit të Matit”.
“Ndërtimi i një vepre të tillë ndikon në prodhimet bujqësore dhe në largimin e banorëve prej këtyre fshatrave. Ne kërkojmë të drejtën tone, duam që burimet tona natyrore të mos preken pa dëshirën e shumicës së njerëzve. Nuk jemi kundër askujt, por kërkojmë të kemi dinjitetin tonë”, thanë banorët në takim.
Të pranishmit kërkuan mbështetjen e deputetit Agron Malaj, strukturave lokale dhe atyre të drejtësisë.
Deputeti Malaj nga ana e tij hodhi poshtë çdo akuzë të padenjë që është bërë se ai ka lidhje me ndërtimin e HEC-it të Kurdarisë.
“Çdo vepër që ndërtohet pa dëshirën e popullit, pa pyetur qytetarët, është i paligjshëm. Unë nuk do ta shpërdoroj kurrë besimin tuaj, mbështetjen e dhënë ndër vite. Kurrë nuk kam qenë dhe nuk do të jem kundër interesave të banorëve të Matit”, theksoi deputetit i Qarkut Dibër, Agron Malaj.