Fero ndodhet përballë tri akuzave të rënda penale të ngritura nga Prokuroria Themelore e Gjilanit: dhunë në familje, ngacmim seksual dhe kanosje serioze ndaj ish-bashkëshortes së tij, modeles Arbenita Ismajli. Sipas aktakuzës të siguruar nga Paparaci, gjatë periudhës qershor-tetor 2024, Fero dyshohet se ka ushtruar dhunë të vazhdueshme psikologjike ndaj Arbenitës, përmes ofendimeve të përsëritura dhe komunikimeve kërcënuese, përfshirë takimet me të për çështjen e fëmijës së përbashkët në Qendrën për Punë Sociale në Gjilan.
Në dosjen hetimore thuhet se artisti e ka përballur ish-bashkëshorten me një varg fyerjesh dhe veprimesh që kanë tejkaluar kufijtë e komunikimit, duke i shkaktuar asaj frikë, dhimbje dhe shqetësim të madh emocional. Një nga mesazhet që përmendet në aktakuzë është: “Me kon je tu fol…qoma shpejt… për çka i ke ly buzt”.
Akuzat shkojnë edhe më tej, duke përfshirë pretendime për ngacmim seksual të vazhdueshëm, verbal dhe fizik. Fero akuzohet se e ka puthur kundër vullnetit ish-bashkëshorten dhe i është drejtuar me fjalë të tilla si “ti je gruaja jem, unë kam të drejt me fjet me ty”, duke injoruar qëndrimin dhe refuzimin e saj.
Situata mes dyve thuhet se ka kulmuar në shtator 2024, kur Prokuroria thekson se Fero e ka kërcënuar rëndë Arbenitën me jetë: ”Ki me ma ni zonin… të vraj, e ta nxjerri shpirtin”,-deklaratë që është ndarë përmes mesazheve në WhatsApp. Prokuroria në aktakuzën e ngritur në dhjetor të vitit të kaluar, kërkon që reperi të dënohet sipas ligjit, duke prezantuar edhe provat përkatëse për të mbështetur padinë. Akuzat janë të mbështetura me dokumentim të komunikimeve, dëshmi dhe deklarata të palës së dëmtuar.
