Deputeti socialist Agron Malaj ka reaguar pas protestës së zhvilluar para Bashkisë Klos lidhur me ndërtimin e hidrocentralit nga kompania “Global Interpace Grup sh.p.k”, duke theksuar se është në krah të banorëve të Njësisë Administrative Suç-Kurdari, të cilëve uji u duhet për jetesë dhe bujqësi. Megjithatë, ai ka shprehur habinë për qëndrimin e përfaqësuesve të Partisë Demokratike, të cilët sipas tij, po protestojnë kundër një kontrate që është firmosur pikërisht nga drejtues të së njëjtës parti vite më parë.
“Sot ndoqa me vëmendje protestën e zhvilluar para Bashkisë Klos lidhur me ndërtimin e Hec Global Interpace Grup sh.p.k (administrator Ashim Doma).
Që në krye të herës dua të shpreh mbështetjen time për popullin e Njësisë Administrative Suç-Kurdari. Uji për këta njerëz punëtore dhe bujarë është veta jeta. Por, s’mund të fsheh habinë time kur pashë deputeten e Partisë Demokratike të dalë nga votat e Dibrës që ose nuk njeh historinë e partisë që përfaqëson ose në rastin më të mirë përpiqet ta mohojë atë.
Deputetja kërkon të bëjë përgjegjëse Kryetaren aktuale të Bashkisë Klos për kontratën e miratuar nga ish-kryetari i kësaj bashkie, demokrati Basir Çupa, bashkë me Zana Elezin, ish-kryetaren e Këshillit Bashkiak dhe Ilir Celikun, ish -Administrator i Njësisë Suc- Kurdari. Për ironi të fatit këta persona, anëtarë të kryesisë së PD-së na zhvillojnë protesta para bashkisë për një kontratë që e kanë firmos po vetë.
Tani këta ose nuk dinë çfarë bëjnë ose duan të tallin e gënjejnë popullin me maskarada të tilla.
Nëse synojnë këtë të dytën, më vjen keq t’i zhgënjej, por klosianët i njohin mirë dhe nuk i hanë dokrrat e tyre”,shkruan Malaj.
