Në Zallë Gjoçaj dhe Shkopet vazhdojnë të jenë aktive dy vatra zjarri. Nëse në Shkopet flakët janë vënë nën kontroll nga forcat e ushtrisë dhe bashkisë Mat, në Zallë Gjoçaj situata është më kritike.
Zjarri i rënë ditë më parë te Liqeni i Luleve, në Lurë, u përhap me shpejtësi dhe përfshiu dy ditë më parë edhe pyjet e larta të Zallë Gjoçajve.
Dje Forcat e Armatosura, punonjës e specialistë të Bashkisë Mat, të Zonave të Mbrojtura dhe Policisë lokale bënë përpjekje maksimale për shuarjen e zjarrit në Zallë Gjoçaj. Pati dhe ndërhyrje nga ajri, por situata paraqitet e rëndë.
Edhe sot në pyjet e këtij masivi vijojnë përpjekjet për izolimin e zjarrit dhe shuarjen e tij, por era e fortë, terreni mjaft i thyer dhe dendësia e pyllit e pengon punën e forcave ushtarake dhe civile.