Njësia Policore Detare dhe Policia Kufitare, kanë kryer monitorim dhe kontrolle intensive në hapësirën detare nga Ksamil në Velipojë, si pjesë e operacionit “SIGURIA DETARE”, duke bllokuar 30 mjete lundruese vetëm gjatë kësaj jave.
Gjatë këtyre kontrolleve janë verifikuar 431 mjete lundruese, prej të cilave 12 janë konstatuar duke shkelur perimetrin e sigurisë dhe drejtuesit janë ndëshkuar me gjobë prej 100,000 lekësh secili.
Po ashtu, Policia ka ndërhyrë në 7 raste për shpëtimin e 13 personave në rrezik në det.
Autoritetet bëjnë apel për respektimin rigoroz të rregullave të përdorimit të mjeteve lundruese dhe nxisin qytetarët të denoncojnë çdo shkelje në numrin pa pagesë 112.
Njoftimi i plotë i policisë
“Në kuadër të operacionit “SIGURIA DETARE”, Policia Kufitare, në bashkëpunim me Njësinë Policore Detare, po kryen monitorime dhe kontrolle intensive në hapësirën detare nga Ksamili në Velipojë, si dhe në hapësirat liqenore dhe lumore, me qëllim evidentimin e shkelësve të rregullave të lundrimit, të perimetrit të sigurisë, apo të përdorimit të mjeteve lundruese pa dokumentacion përkatës.
Përgjatë kësaj jave janë kontrolluar 431 mjete lundruese, nga të cilat 30 janë bllokuar për shkelje të perimetrit të sigurisë detare, ushtrim aktivitetesh jashtë zonave të miratuara dhe pa dokumentacion përkatës.
Mjetet e bllokuara janë 18 jet ski, 7 skafe, 3 gomone dhe 2 varka metalike me motor uji të instaluar.
12 mjete lundruese janë konstatuar duke lundruar brenda perimetrit të sigurisë, duke rrezikuar jetën e pushuesve. Drejtuesit e tyre janë ndëshkuar me masë administrative 100,000 lekë secili.
Ndërkohë, nga Ksamili në Velipojë, Policia Kufitare ka ndërhyrë në 7 raste për t’u ardhur në ndihmë 13 shtetasve, të cilët ndodheshin në rrezik për shkak të dallgëve të forta apo defekteve në mjetet e tyre lundruese.
Policia Kufitare apelon për respektimin me rigorozitet të rregullave për përdorimin e mjeteve lundruese, që të mos shkelin perimetrin e sigurisë, të lundrojnë vetëm në zonat e lejuara dhe të jenë të pajisur me mjetet e shpëtimit.
Policia e Shtetit fton qytetarët dhe pushuesit të denoncojnë çdo rast të shkeljes së perimetrit të sigurisë detare apo të masave të sigurisë, në numrin pa pagesë 112, duke u garantuar reagim të menjëhershëm dhe masa konkrete ndaj çdo shkelësi.”, thuhet në njoftim.