Zv.kryeministri Italian, Matteo Salvini dhe partneri i tij i koalicionit në qeverinë italiane kanë shprehur hapur mbështetjen e tyre ndaj “jelekverdhëve”. Salvini përmes deklaratave në rrjeteve sociale, ka akuzuar shpeshherë Presidentin Emannuel Macron se ka dalë kundër popullit të tij.
“Unë mbështes qytetarët e ndershëm që protestojnë kundër një presidenti qeverisës i cili është kundër popullit të tij”, tha zëvendëskryeministri italian.
Nënkryetari i Këshillit të Ministrave të Italisë, Luigi Di Maio, i cili është kreu i Lëvizjes Pesë-yje (M5S), u bëri thirrje demonstruesve në blogun e partisë së tij “Të mos dobësohen”.
Di Maio tha se politika, si në Francë dhe në Itali, “është bërë e shurdhër ndaj nevojave të qytetarëve që janë mbajtur jashtë vendimeve më të rëndësishme që prekin popullin”.
Protesta e “jelekverdhëve” filloi në mes të nëntorit 2018 si një protestë kundër një rritje të propozuar në shpenzimet e karburantit. Pas plotësimit të kërkesës për uljen e çmimit të naftës, janë shtuar edhe kërkesat dhe pretendimet e popullit francez mbi standardet e jetesës dhe politikat e Macron. Momenti kulminant i saj ishte më 17 nëntor, ku më shumë se 280,000 njerëz u mblodhën për të protestuar në Champs-Elysees.