Një grup prej 50 adoleshentësh hebrenj francezë është zbritur nga një avion i Vueling, i cili ishte planifikuar të nisej nga Valencia për në Paris, pas ndërhyrjes së Guardia Civile spanjolle.
Sipas linjës ajrore, shkak për ndërhyrjen u bë një sjellje e konsideruar si problematike dhe e papërshtatshme nga stafi i ekuipazhit, që sipas tyre mund të kishte ndikuar në sigurinë e fluturimit. Në një deklaratë zyrtare, Vueling tha se grupi kishte ndërhyrë në demonstrimin e procedurave të sigurisë, kishte aktivizuar maska oksigjeni dhe kishte përfshirë pajisje emergjente si jelekët e shpëtimit dhe bombolat.
Kapiteni i fluturimit VY8166 vendosi të kërkonte ndërhyrjen e autoriteteve spanjolle, të cilat pas vlerësimit të situatës bënë zbritjen e grupit nga avioni. Sipas Vueling, pasagjerët u larguan për arsye të zbatimit të ligjit të sigurisë së aviacionit, konkretisht nenit 41 të Ligjit 21/2003.
Grupi i të rinjve ishte pjesë e një kampi veror të organizuar nga Shoqata Club Kineret, e cila ka bërë të ditur se po shqyrton mundësinë e ndjekjes ligjore ndaj kompanisë ajrore, duke përmendur si arsye diskriminimin dhe trajtimin e padenjë të të miturve. Avokatja Julie Jacob deklaroi se fëmijët janë nën moshën 15 vjeç dhe po shqyrtohet mundësia e një padie për dhunë fizike, psikologjike dhe diskriminim fetar.
Ngjarja ka sjellë edhe reagime nga autoritetet izraelite, përfshirë Ministrin Amichai Chikli, i cili e komentoi incidentin si të rëndë dhe deklaroi se adoleshentët po këndonin në gjuhën hebraike kur u kërkua zbritja e tyre nga avioni. Sipas tij, një pjesë e ekuipazhit thuhet të ketë përdorur komente të papërshtatshme për shtetin e Izraelit.
Linja ajrore Vueling, nga ana tjetër, ka theksuar se ndërhyrja ishte ekskluzivisht për arsye sigurie dhe se të gjitha vendimet u morën në përputhje me rregulloret në fuqi për transportin ajror.