Drejtori i Emergjencave Civile, Haki Çako, ka dhënë një përditësim të situatës së zjarreve në vend.
“Kemi pasur zjarre masive në Bashkinë e Delvinës, Konispolit, Himarës dhe Vlorës. Është punuar dhe vijon puna intensive nga strukturat tona. Mbrëmja e kaluar ka qenë shumë intensive në zonën e Lukovës, ku zjarret janë riaktivizuar dhe kanë qenë rrezik i madh për zonat e banuara, por falë punës së jashtëzakonshme, u bë i mundur eliminimi i pasojave nga zonat e banuara”, tha Çako.
“Ka pasur rrezik të shtuar në Lukovë, ashtu si edhe në zonën e Delvinës. Kemi ende prezencë zjarri që po monitorohet në vazhdimësi, me të gjitha kapacitetet, të mbështetura edhe nga ajri me helikopterë”, shtoi Çako.
Sa i përket rrezikut që i kanoset banorëve dhe pushuesve, sidomos në Borsh, Çako tha: “Na është dashur që të ndërhyjmë edhe me mirëkuptimin e turistëve, duke i zhvendosur nëse ka pasur rritje të prezencës së zjarrit.
Strukturat kanë qenë gjatë gjithë natës në krye të detyrës, duke bërë të mundur që të mos rrezikohet asnjë jetë qytetari”.