Një episod dramatik u regjistrua në Aeroportin Ndërkombëtar të Denverit, ku pasagjerët e një fluturimi të American Airlines u detyruan të evakuohen urgjentisht përmes rrëshqitëseve të emergjencës, pasi tym i dendur përfshiu kabinën e avionit.
Fluturimi 3023, një Boeing 737 MAX 8 me destinacion Aeroportin Ndërkombëtar të Miamit, u detyrua të ndalonte menjëherë pas ngritjes, kur kapiteni sinjalizoi një “incident të mundshëm me sistemin e uljes”, sipas njoftimit zyrtar të Administratës Federale të Aviacionit (FAA).
Pamje të publikuara nga mediat lokale treguan skena kaotike, ku pasagjerët – disa duke mbajtur çanta personale apo fëmijë të vegjël në krahë – rrëshqisnin me shpejtësi në pistën prej betoni. Disa prej tyre u panë duke u penguar gjatë zbritjes, përfshirë një të rritur që mbante një fëmijë të vogël.
Pavarësisht tensionit dhe momentit të ndjeshëm, të gjithë udhëtarët arritën të dalin të sigurt dhe u transportuan me autobus drejt terminalit të aeroportit.
Incidenti ndodhi të shtunën pasdite dhe, për fat të mirë, nuk raportohet për të lënduar. Shkaqet e ngjarjes janë ende nën hetim.