Bashkorganizimi i Kampionatit Europian 2027 për 21-vjeçarët nga Shqipëria dhe Serbia vijon të përplasë Federatën Shqiptare të Futbollit (FSHF) dhe grupimin e Tifozave Kuq e Zi (TKZ) të kombëtares.
Së fundmi, Armand Duka, kreu i FSHF-së ishte në një vizitë në Luginën e Preshevës ku Federata organizoi një turne për fëmijët. Tifozat Kuq e Zi nuk e kanë lënë me kaq, teksa në këtë turne kanë protestuar në mënyrën e tyre.
Në një pankartë vendosur pranë fushës së lojës shkruhej: “Jo bashkë me shtetin që na mohon. Jo Euro 2027 me Serbinë”.
Përplasja e TKZ-së me FSHF-në erdhi fill pasi UEFA miratoi kërkesën e dy federatave që Euro 2027 të zhvillohej në Shqipëri dhe Serbi. Për këtë Tifozat Kuq e Zi kanë mbetur edhe jashtë stadiumeve për ndeshjet e Kombëtares, me FSHF që u ‘hakmorr’ për rebelimin e tyre.
