Një tërmet i fuqishëm me magnitudë 8.8 ballë u regjistrua sot pranë brigjeve të Kamçatkës, Rusi. Pas tërmetit, u lëshua një paralajmërim për cunami për Rusinë, Japoninë , Guamin, Hawaiin dhe Alaskën.
Autoritetet lokale raportuan se valë prej 3-4 metrash, të shkaktuara nga tërmeti, u regjistruan në rrethin Yelizovsky të Kamçatkës. Epiqendra e tërmetit ndodhej afërsisht 119 kilometra në lindje të Petropavlovskut në Gadishullin Kamçatka, në një thellësi prej 20.7 kilometrash.
Disa persona u plagosën në rajonin e largët rus, ndërsa pjesa më e madhe e bregdetit lindor të Japonisë u urdhërua të evakuohej.
“Tërmeti i sotëm ishte më i forti në dekada”, deklaroi guvernatori i Kamchatka-s, Vladimir Solodov.
“U bëj thirrje të gjithëve të qëndrojnë larg bregdetit në zonat e prirura ndaj cunamit dhe të dëgjojnë njoftimet të lëshuara me altoparlantë”, shtoi guvernatori.
Në Japoni, një cunami vlerësohet të arrijë një metër lartësi në pjesën jugore të Hokkaidos, ishullit më verior të Japonisë, i cili ndodhet në jugperëndim të epiqendrës së tërmetit, si dhe në zonat verilindore, lindore, qendrore dhe jugperëndimore të arkipelagut japonez. Cuname deri në 20 centimetra priten gjithashtu në ishullin Shikoku në perëndim të vendit dhe në ishujt që përbëjnë arkipelagun e Okinawas në jugperëndim.
Instituti Rus i Gjeofizikës e ka quajtur këtë tërmet “më të fuqishmin që nga viti 1952 “. Lëkundja e parë u pasua, gjysmë ore më vonë, nga një tjetër me magnitudë 7 dhe një e treta me magnitudë 6.5. Sipas departamentit rajonal rus të mbrojtjes civile, lëkundjet ishin mjaft të forta në qytetin bregdetar të Severo-Kurilsk.
Ndërkohë sipas qendrave të paralajmërimit në SHBA, valët e para të cunamit të gjeneruara nga tërmeti i Kamçatkës kanë arritur tashmë në Ishujt Aleutian perëndimorë në Alaskë, me valë që arrijnë 30 centimetra mbi nivelin e baticës.
