Këngëtari dhe fyelltari i Vranishtit të Labërisë, Lavdosh Shkurtaj ka performuar disa melodi baritore shqiptare në Xhaminë Blu (Sulltanahmet) në Stamboll të Turqisë.
Instrumenti popullor i Labërisë, cula dyjare (e njohur edhe si cyla ose cylja dyjare sipas zonave të krahinës së Labërisë) ka një histori mëse 2000 vjeçare.
Kjo vegël e veçantë muzikore mendohet se i ka fillesat në shekullin e V e të IV para erës sonë, në mos edhe më herët. Cula dyjare bëhet me drurin e panjës që gjendet në malet e Labërisë, dhe ka dy rrugë të ajrit të cilat kombinohen mjeshtërisht nga barinjtë e zonës në meloditë e tyre.
Lavdosh Shkurtaj, këngëtar i Grupit Polifonik të Vranishtit, prej vitesh ka lëvruar meloditë e barinjve të zonës të Lumit të Vlorës, kryesisht të maleve të Vranishtit. Prej vitesh ka punuar në këtë zonë me barinjtë e kësaj zone si zooteknik dhe ka mësuar shumë nga çobanët që jetonin në malet e Çikës dhe Bogonicës.
Cula dyjare hyn në familjen e fyejve por ka të veçantën e kombinimit dhe pasurisë së melodive të ndryshme që mund të jenë gazmore, melankolike, etj. Cula dyjare dhe meloditë e saj janë një pasuri e çmuar kulturore e vendit tonë që fatkeqisht nuk po lëvrohet më nga të rinjtë.
Ju ftojmë të shijojmë këto melodi nga Lavdosh Shkurtaj që e shpie traditën popullore shqiptare në metropolin e Turqisë, Stamboll.