Këtë të shtunë pika e kalimit kufitar të Kapshticës ka regjistruar një fluks të lartë hyrjesh nga Greqia drejt Shqipërisë. Dhjetëra automjete janë rreshtuar në kolonë, ndërsa pala shqiptare po punon me katër sportele në hyrje dhe dy në dalje, duke aplikuar procedurë të përshpejtuar për të shmangur pritjet e gjata.
Nga ana tjetër, pala greke ka hapur katër sportele në dalje, por për shkak të numrit të madh të emigrantëve shqiptarë që po kthehen për pushime, është krijuar ngarkesë në segmentin kufitar.
Sipas të dhënave zyrtare, më 8 gusht 2025, në Kapshticë kanë hyrë 6242 shtetas dhe kanë dalë 3557. Në pikën kufitare të Qafë-Thanës janë regjistruar 5248 hyrje dhe 5073 dalje, ç’ka tregon se fluksi është i lartë në të dyja pikat kufitare, me dominim të hyrjeve nga Greqia dhe Maqedonia e Veriut.