Kryeministri Edi Rama ka reaguar për ndarjen nga jeta të gazetarit Artur Zheji. Në një mesazh të shkurtër, Rama i jep lamtumirën mikut të tij të dikurshëm, duke i uruar paqe shpirtërore përtej jetës.
“Lamtumirë mik kohësh të tjera dhe e gjetsh matanë paqen për shpirtin”, shkruan Rama. Presidenti Bajram Begaj shprehu ngushëllimet për familjen, ndërsa shkruan se Zheji ishte një prej zërave më aktivë dhe më kontribuues në debatin publik në Shqipëri.
“Ngushëllimet më të ndjera familjes dhe komunitetit të medias për ndarjen e papritur nga jeta të Artur Zhejit, një prej zërave më aktiv, më të angazhuar dhe më moderatorë e kontribuues në debatin publik në Shqipëri”, shkruan Begaj.
Ngushëllim ka dhënë edhe kreu i PD-së. Sali Berisha shkruan që shpirti i tij të gjejë paqen e merituar. ”Miq, gazetari, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë. Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin”.