Kreu i Partisë Demokratike, Sali Berisha, ka reaguar pas lajmit të ndarjes nga jeta të aktorit të shquar Enver Petrovci, duke e cilësuar një humbje të madhe për artin dhe kulturën shqiptare.
Në një mesazh të ndjerë, Berisha e përshkruan Petrovcin si një kolos të skenës dhe kinematografisë shqiptare, i cili me krijimtarinë e tij la gjurmë të pashlyeshme në historinë e artit kombëtar dhe ndërkombëtar.
“Dielli perëndoi përgjithmonë për të pavdekshmin Enver Petrovci. Arti dhe kultura e kombit shqiptar janë në zi,” shkruan Berisha. Ai theksoi se Petrovci do të mbetet përjetësisht i gjallë në kujtesën dhe trashëgiminë kulturore të shqiptarëve.
Duke shprehur ngushëllime të sinqerta për familjen, miqtë dhe të afërmit, Berisha përfundon mesazhin me një lutje për paqen e shpirtit të aktorit të madh: “Lutem që shpirti i madh i Enver Petrovci të gjejë paqen e merituar. Amin.”