Ministrja për Europën dhe Punët e Jashtme, Elisa Spiropali ka reaguar për zhvillimet në Lindjen e Mesme, pas vendimit të Hamasit për të liruar të gjithë pengjet. Ajo e cilëson këtë zhvillim si një “flakë të brishtë, por të çmuar, të shpresës”, duke uruar që ky hap të shënojë fillimin e një epoke të re paqeje mes izraelitëve dhe palestinezëve.
“Dy vite dëshpërimi pas sulmeve të tmerrshme, lajmi për vendimin e Hamasit për të liruar të gjithë pengjet ndez një flakë të brishtë, por të çmuar, të shpresës. Urojmë që kjo të shënojë agimin e një kapitulli të ri, ku izraelitët dhe palestinezët të mos jetojnë më në dhimbje paralele, por në paqe dhe dinjitet të përbashkët”,-shkruan Spiropali.
Ajo shtoi se Shqipëria e mirëpret këtë hap me zemër të hapur, duke theksuar edhe vlerësimin për përpjekjet e Presidentit Trump, të cilat – sipas saj – “e kanë afruar Lindjen e Mesme më pranë horizontit të paqes së shumëpritur”.