Në vetëm 9 muaj nga Shqipëria dhe vendet e tjera të Ballkanit janë nisur drejt Kolumbisë 1 milionë euro fitime nga aktiviteti i prostitucionit nga grupi që u shkatërrua 2 ditë më parë pas një operacioni shqiptaro-kolumbian të koordinuar nga EUROPOL.
Burime për Report Tv bëjnë me dije se gjatë kontrollit në banesën në Kolumbi të Lucas Betancur dhe babait të tij, që konsiderohen si koka e këtij grupi kriminal, janë gjetur kode të Bitcoin, fatura të shumta të transfertave të parave që dyshohet se vinin nga aktiviteti i prostitucionit.
Hetimet gjithashtu kanë zbuluar disa banesa apo hotele që përdoreshin si fole për prostitucionin në Tiranë për vajzat kolumbiane. Sipas burimeve, mësohet se i njëri prej të arrestuarve, Mirel Shperdheja, është pronar i një agjencie të pronave të paluajtshme, kishte vendosur 15 banesa me Airbnb në dispozicion për prostitucionin.
Ndërsa Ilmar Gugashi, është pronari i hotelit “Alindro” në afërsi të Gjykatës së Lartë, godinë gjithashtu e përdorur në këtë aktivitet. I arrestuari tjetër Dritan Suka, komunikonte drejtpërdrejt me Lukasin në Kolumbi, ndërkohë që jepte gjithashtu banesa me qira për vajzat që shfrytëzoheshin.
Rrjet i fuqishëm i prostitucionit, i cili sillte vajza nga Amerika Latine dhe Azia në Shqipëri u shkatërrua nga një hetim i përbashkët 8 mujor. Në Kolumbi u kap kreu i rrjetit, i cili merrte peng edhe familjarët e vajzave nëse ato refuzonin të prostituonin në Shqipëri. 7 bashkëpunëtorë të tij u kapën në Tiranë, të cilët menaxhonin prostitucionin në vendin tonë dhe i transferonin fitimet në kriptovalutë. 48 vajza të huaja, të cilat u shfrytëzuan për prostitucion, po hetohen në gjendje të lirë. Autoritetet kolumbiane përveç Betancour arrestuan edhe 9 persona të tjerë.