Kleviol Ahmeti, i njohur për publikun si “Cllevio”, pritet të kthehet nesër në Shqipëri, pas rreth tre muajsh ndalim në Emiratet e Bashkuara Arabe, konkretisht në Dubai.
Sipas burimeve për mediat, Cllevio ka nënshkruar dokumentet për ekstradim, duke pranuar të kthehet në Shqipëri për t’u përballur me akuzat ligjore që ai pretendon se janë ngritur nga kundërshtarët e tij. Burimet bëjnë me dije se ekstradimi do të realizohet nesër, më 8 tetor, nën kujdesin e Interpol-it, ndërsa pas mbërritjes në Tiranë, pritet të jepen më shumë detaje lidhur me situatën e tij ligjore.
Cllevio ka qenë një prej emrave më të komentuar në showbiz-in shqiptar, i njohur për deklaratat e drejtpërdrejta, konfliktet publike dhe videot virale në rrjetet sociale. Shpeshherë ai është përfshirë në debate me figura të tjera të njohura të muzikës dhe internetit, duke u bërë një personazh i ndjekur, por edhe i diskutueshëm.
Fansat dhe ndjekësit e tij kanë shprehur kuriozitet dhe shqetësim për fatin e Cllevios, ndërsa në disa faqe online janë publikuar teori të ndryshme për arsyet e ndalimit të tij. Tashmë, të gjithë presin deklaratën e tij të parë publike, ku pritet të shpjegojë rrethanat e ndalimit në Dubai, si dhe versionin e tij për akuzat që e kanë çuar në këtë situatë.