Sekretari i Përgjithshëm i NATO-s, Mark Rutte, dërgoi një mesazh nga Konferenca e Mbrojtjes Kibernetike të NATO-s që po zhvillohet në Tiranë.
“Sot tastjera është armë luftë që shënjestron shoqëritë tona. Aktorë shtetërorë e joshtetërorë punojnë kundër nesh. Në përgjigje të kësaj, NATO vijon të bëhet edhe më e fortë në hapësirën digjitale”, tha Rutte.
Ai tha se Aleanca është më e vendosur se kurrë për të forcuar kapacitetet e saj në hapësirën kibernetike dhe për të përballuar çdo kërcënim që sfidon sigurinë kolektive.
“NATO do të bëhet më e fortë në hapësirën kibernetike”, deklaroi Rutte në një video-mesazh drejtuar pjesëmarrësve të konferencës. “Mbrojtja jonë do të përforcohet dhe do të jemi më rezistentë ndaj sulmeve”
Ai theksoi se NATO disponon një rrjet unik për mbrojtje, që e vendos Aleancën në një pozitë të favorshme për të reaguar me efikasitet ndaj sulmeve kibernetike, të cilat po bëhen gjithnjë e më të sofistikuara dhe të rrezikshme.
“NATO është një aleancë e vlerave të përbashkëta, dhe reagimi ynë do të jetë gjithmonë i menjëhershëm dhe i bazuar në norma”, nënvizoi Sekretari i Përgjithshëm.
Në një kohë kur agresionet kibernetike janë kthyer në një mjet të përhapur i luftës hibride, Rutte tha se qëndrueshmëria dhe bashkëpunimi mes aleatëve është thelbësor.
“Qëndrojmë bashkë kundër çdokujt që kërkon të na dëmtojë”, ishte mesazhi që ai përcolli nga Tirana, duke theksuar unitetin dhe vendosmërinë e NATO-s në përballjen me kërcënimet e epokës digjitale.
Konferenca e Mbrojtjes Kibernetike në Tiranë po zhvillohet në një moment kritik për sigurinë globale, dhe roli i Shqipërisë si vend mikpritës dëshmon rëndësinë në rritje të Ballkanit në sigurinë euroatlantike.