Mjegulla e dendur ka pushtuar segmentin e Rrugës së Arbrit, nga ura e Çeranecit deri në Maqellarë, duke krijuar vështirësi të mëdha për drejtuesit e mjeteve.
Situata paraqitet më problematike në orët e para të mëngjesit, kur fusha e shikimit është e kufizuar, ndërsa mungesa e tabelave sinjalizuese e rrit rrezikun në këtë aks.
Ky segment rrugor është konsideruar prej kohësh ndër më të rrezikshmit, pasi aksidentet kanë qenë të shumta, madje edhe me pasoja në jetë njerëzish.
Banorët e zonës së Gjoricës, të cilët nuk kanë rrugë alternative përveç daljes në Rrugën e Arbrit, shprehen se rrezikohen çdo ditë.
Drejtuesit e mjeteve kërkojnë nga institucionet përkatëse të marrin masa urgjente për vendosjen e sinjalistikës rrugore, pasi gjatë gjashtë muajve të dimrit kjo zonë mbetet e mbuluar nga mjegulla e dendur.