Sonte në orën 19:00 në “Air Albania” kombëtarja shqiptare e futbollit do zhvillojë një test miqësor kundër Jordanisë, një ekip që e ka siguruar pjesëmarrjen në fazën finale të Kupës së Botës 2026. Veç mendjes në fushë, kuqezinjtë do i kenë sytë edhe nga rezultatet e rivalëve në Grupin K kualifikues të Kupës së Botës.
Shqipëria tre ditë më parë fitoi 0-1 në Serbi dhe la këta të fundit në vendin e tretë me katër pikë më pas, duke ‘blinduar’ në një farë formë vendin e dytë, ndërsa kreu mbahet nga Anglia me 15 pikë të plota pas pesë takimeve.
Kundër Jordanisë, nga minuta e parë pritet një ekip totalisht ndryshe nga sfida në Leskovac, fituar 0-1 kundër serbëve. Pritet që ekipi i dytë i Kombëtares të jetë në fushë, një mundësi për lojtarët që nuk kanë marrë minuta. Nga fillimi edhe Klisman Cake që duket se do debutojë me ngjyrat kuqezi, ndërsa në pjesën e dytë minuta duhet të ketë edhe për Nazmi Gripshin.
Formacioni i mundshëm:
Shqipëria (4-3-3): Dajsinani; Balliu, Cake, Mihaj, Aliji; Ramadani, M. Berisha, N. Bajrami; Hoxha, Asani, Daku Trajner: Sylvinho