Në Durrës kanë nisur një seri investimesh madhore që kanë hapur një kapitull të ri zhvillimi për qytetin bregdetar. Kryeministri Edi Rama ka ndarë pamje nga faza e dytë e punimeve për shëtitoren në bregdet, një investim i rëndësishëm që pritet t’i japë kësaj zone një pamje dhe hapësirë të re, moderne e tërheqëse për qytetarët dhe turistët.
Rama informon se aktualisht po punohet për zgjerimin e brezit të rërës përgjatë gjithë gjatësisë së plazhit, ndërhyrje që do të krijojë më shumë hapësirë për pushuesit. “Projekti përfshin një shtrirje prej rreth 3,2 kilometrash, nga Ura e Dajlanit deri tek Godina e Konvaleshencës, që synon rehabilitimin e plotë të vijës bregdetare”, shkruan Rama.
Ky projekt do ta transformojë këtë pjesë të shëtitores buzë detit në një hapësirë urbane shumë më tërheqëse, duke kontribuar në rritjen e cilësisë së ofertës turistike të portës së Adriatikut.