Gjykata e Beratit këtë të enjte ka lënë në burg Kristo Mema (alias Kontandin Oxhaj), i cili dy ditë më parë vrau me thikë vizitorin nga Tirana vetëm sepse ky i fundit preku kalin e tij. 63-vjeçari ka shprehur pendesë dhe teksa përsëriti sërish se gjithçka ndodhi në gjaknxehtësi e sipër, pasi autori e kishte ofenduar dhe sharë nga familja. Po ashtu ai u kërkoi falje edhe familjarëve të viktimës.
Ngjarja e rëndë ndodhi në oborrin e kalasë, në një zonë që aktualisht është në rikonstruksion, në sytë e familjarëve të viktimës dhe turistëve të tjerë. Sipas burineve 63-vjeçari nuk kishte leje për të shëtitur turistët me kalë kundrejt pagesës, megjithëse këtë aktivitet e ushtronte prej kohësh në kalanë e qytetit-muze.
Nga hetimet e kryera Kristo Mema kishte kryer një tjetër vrasje në vitin 1993, po në Berat, kur kishte goditur fqinjin e tij me thikë pas një zënke për motive banale. Pas asaj ngjarjeje, ai ishte larguar në Greqi për rreth 25 vjet, kishte ndërruar identitetin dhe përdorte emrin Kontandin Hoxha. Për krimin e parë nuk ka vuajtur asnjë ditë burg, pasi dënimi ishte parashkruar me kalimin e viteve.