Një 33-vjeçar, është ekstraduar ditën e sotme, 31 tetor, nga Italia në Shqipëri, pasi ishte shpallur në kërkim ndërkombëtar.
I riu, është dënuar në vitin 2023 nga Gjykata e Rrethit Gjyqësor Krujë me 4 vite heqje lirie, për veprën penale “Kultivimi i bimëve narkotike”.
Sipas njoftimit të Policisë së Shtetit, 33-vjeçari organizoi kultivimin me bimë narkotike të një sipërfaqe toke që është pronë publike në fshatin Krastë, Krujë. Ai bashkëpunoi së bashku me tre persona të tjerë, por tentativa e këtij krimi u parandalua që në fazë fillestare.
Të riut i ka mbetur dhe rreth 1 vit burgim për të vuajtur.
“Në vitin 2021, organizoi kultivimin e bimëve narkotike në Krujë, ekstradohet nga Italia, 33-vjeçari.
Në vijim të bashkëpunimit të ngushtë ndërmjet strukturave homologe të Interpolit, në Tiranë dhe në Romë, u finalizua procedura për ekstradimin nga Italia, në Shqipëri, të shtetasit të shpallur në kërkim ndërkombëtar, E. G., 33 vjeç, të lindur në Krujë.
Gjykata e Rrethit Gjyqësor Krujë, në vitin 2023, e ka dënuar këtë shtetas, me 4 vjet burgim, për veprën penale “Kultivimi i bimëve narkotike”. Nga dënimi, 33-vjeçarit i ka mbetur për të vuajtur rreth 1 vit burgim.
Në vitin 2021, shtetasi E. G., në rolin e organizatorit, ka bashkëpunuar me 3 shtetas, për të përgatitur një sipërfaqe toke (pronë publike) në fshatin Krastë, Krujë, për kultivim të bimëve narkotike. Si rezultat i ndërhyrjes së Policisë, tentativa për këtë rast kultivimi u parandalua që në fazë fillestare.
Më tej, gjatë kontrolleve në banesat e shtetasve të implikuar në këtë rast, Policia gjeti 240 fidanë Cannabisi, 1 armë zjarri me municion dhe mjete që i shërbenin kultivimit të bimëve narkotike.” njofton policia.