Qeveria ”Rama 4” shpalli 2 nëntorin ditë zie kombëtare, në nderim të Fatos Nanos, ish-Kryeministër dhe një prej figurave më të rëndësishme të politikës shqiptare. Në respekt të kontributit të çmuar në jetën publike dhe politike të vendit, në nderim të Fatos Nanos do të zhvillohet ceremonia funebre shtetërore dhe Homazhet Kombëtare për të ndjerin në Pallatin e Kongreseve.
Në të gjitha institucionet shtetërore dhe publike flamuri kombëtar do të ulet në gjysmështizë. Ndërsa në orën 12:00 të ditës së dielë do të ndërpriten të gjitha veprimtaritë dhe do të mbahet një minutë heshtje në mbarë vendin.
Ceremonia do të jetë e hapur edhe për publikun nga ora 08:30-11:00 ndërsa personalitetet do të nderojnë ish kryeministrin Nanon nga ora 11:15-11:45. Në mesditë do t’i jepet lamtumira e fundit Fatos Nano, i cili ndërroi jetë në moshën 73-vjeçare pas komplikacioneve të rënda shëndetësore..
Fatos Nanon e kanë kujtuar edhe ish-kryeministrat e Greqisë dhe Rumanisë, duke e kujtuar si një udhëheqës të tranzicionit, një mik dhe një urë për Ballkanin.