Ministri i Mbrojtjes, Pirro Vengu, ka deklaruar këtë të martë, më 4 nëntor, se Akti Normativ për rishikimin e buxhetit të vitit 2025 i jep mbështetjen e duhur sistemit të mbrojtjes për të forcuar kapacitetet operacionale dhe për të nisur prodhimin vendas të pajisjeve ushtarake.
Në një postim në rrjetet sociale, ministri Vengu shkruan: “Akti Normativ i jep Buxhetit të Mbrojtjes 2025 mbështetjen e duhur për të forcuar kapitalin njerëzor dhe gjithë kapacitetet operacionale, për të nisur prodhimin e armatimit, mjeteve dhe pajisjeve ushtarake ‘MADE IN ALBANIA;, si dhe për të financuar projektet në infrastrukturën kritike.”
Sipas ministrit të Financave, Petrit Malaj, i cili shpjegoi një ditë më parë detajet e ndryshimeve gjatë mbledhjes së Komisionit të Ligjeve, në kuadër të rishikimit të tretë të buxhetit të shtetit për këtë vit, Ministria e Mbrojtjes do të përfitojë një rishpërndarje prej rreth 1.9 miliardë lekësh, në mbështetje të Forcave të Armatosura dhe nevojave të tyre operacionale.
Nga kjo shumë, sipas shpjegimeve të ministrit Vengu:
339 milionë lekë do të përdoren për operacione dhe misione jashtë vendit, për rritjen e gatishmërisë operacionale të forcave si dhe për mbështetje të Spitalit Universitar të Traumës;
619 milionë lekë do të shkojnë për forcimin e kapitalit njerëzor, që përfshin personelin ushtarak dhe civil të sistemit të mbrojtjes;
Ndërsa 56 milionë lekë do të investohen në përmirësimin e infrastrukturës kritike ushtarake.