Kryeministri Edi Rama ka folur për Reformën në Drejtësi dhe punën e SPAK-ut në goditjen e korrupsionit në nivele të larta. Kreu i shtetit shton se ajo çka Shqipëria po bën sot në luftë kundër korrupsionit është unik dhe se asnjë vend tjetër në rajon nuk mund të pretendojë se ka arritur ta bëjë gjithashtu.
”Shqipëria po bën diçka unike në rajon, reformën tonë në drejtësi dhe njohjen nga ana jonë të pavarësisë së drejtësisë. Veprimtaria e plotë e SPAK ka krijuar praktikisht në Shqipëri shembullin se lufta kundër korrupsionit është diçka që shkon shumë përtej fjalëve dhe sipërfaqes, shkon shumë thellë dhe është tejet e ekuilibruar pa parë djathtas apo majtas.
Me shumë fakte që tregojnë se ajo çka kurrë nuk kishte ndodhur në Shqipëri që prej pavarësisë deri shumë pak vite më parë, po ndodh vitet e fundit. Një gjë që asnjë vend në rajon nuk mund të pretendojë se e ka bërë. Në këtë moment, ne pranojmë mbështetje, partneritet por nuk pranojmë leksione nga askush kur vjen puna te korrupsionit”, tha Rama.
Kryeministri për disa arsye teknike ajrore nuk mundi të merrte pjesë sot në samitin për zgjerimin e BE-së të zhvilluar në Bruksel. Për të rikuperuar mosprezencën, Rama dha një intervistë live për Euronews teksa komentoi raport-progresin e BE-së për Shqipërinë si dhe çështje të tjera që lidhen me procesin e integrimit në Europë. ”Raporti është pozitiv dhe i gjithë viti ka qenë tejet pozitiv. Kemi hapur 5 nga 6 grup kapituj brenda pak muajve që është rekord absolut. Është diçka që vetëm deri pak vite më parë nuk mund ta imagjinonim”,-tha më tej Rama.
Gazetarja: Cila është ideja tjetër krijuese që vjen prej jush në rrugën drejt BE?
Edi Rama: Jam i sigurt që keni dëgjuar që Diella është shtatzënë me 83 foshnja, duhet të presë të lindë këta bebe. Nuk është diskutuar shumë që jemi i vetmi vend në këtë proces që kemi përdorur AI, në korpusin ligjor duke e bërë procesin më të shpejtë, edhe në analizë e hartimin e përgatitjes së të gjithë paketave ligjore për tu miratuar në parlament. Po përpiqemi të vrapojmë sa më shumë të jetë e mundur duke përdorur AI por pa harruar kurrë se vendi ynë në europë së pari është i merituar.