Në prag të zgjedhjeve të pjesshme lokale të 9 nëntorit, deputeti i Partisë Socialiste, Agron Malaj, zhvilloi takime elektorale me zgjedhës të Lisit dhe Lagjes së Re, Burrel.
Në një atmosferë entuziazmi, Malaj u bëri thirrje qytetarëve të votojnë kandidatin socialist për Bashkinë Mat, Altin Bojnin, duke theksuar se ai përfaqëson garancinë për vazhdimësinë e punës dhe zhvillimit në këtë zonë.
“Ju ftoj që më 9 nëntor të votoni Altin Bojnin, sepse ai ka treguar se është një drejtues i aftë, me vizion dhe përkushtim për Matin. Ai do të çojë përpara jo vetëm investimet e nisura, por do të realizojë edhe dhjetëra projekte të reja që do t’i japin bashkisë një tjetër ritëm zhvillimi,” u shpreh Malaj.
Deputeti, i cili për gjashtë vite drejtoi Bashkinë Mat, theksoi se falë mbështetjes së qeverisë Rama dhe punës së palodhur, kjo trevë ka njohur ndryshime të prekshme.
“Ne nuk vijmë me premtime boshe apo mashtrime, por me projekte konkrete për progresin e çdo fshati dhe qytetit. Bojni ka mbështetjen e qeverisë Rama, ka mbështetjen time, dhe mbi të gjitha ka fituar besimin e matjanëve,” shtoi ai.
Qytetarët e pranishëm u shprehën të vendosur që të dielën të votojnë masivisht për kandidatin socialist Altin Bojni, duke e cilësuar atë si njeriun e duhur për të çuar përpara zhvillimin e Bashkisë Mat.
