Rusia ka ndërmarrë një sulm të kombinuar masiv ndaj Kievit në orët e para të së premtes, duke shkaktuar zjarre dhe shpërndarë mbetje shpërthyese në shumë zona të kryeqytetit, njoftoi kryebashkiaku Vitali Klitschko. Të paktën 11 persona u plagosën, ndërsa ekipet e emergjencës po reagojnë ndaj goditjeve të shumta.
Pesë të plagosur u dërguan në spital, përfshirë një burrë në gjendje kritike dhe një grua shtatzënë. Sulmet u shoqëruan me shpërthime të fuqishme dhe aktivizimin e mbrojtjes ajrore. Autoritetet paralajmëruan qytetarët të qëndrojnë në strehime deri në përfundimin e alarmit ajror, ndërsa priten ndërprerje të mundshme të energjisë dhe ujit.
Imazhe të publikuara në rrjetet sociale tregojnë zona të ndryshme të qytetit nën flakë dhe banorë që dalin në rrugë mes rrënojave pranë ndërtesave të banimit.
“Rusët po godasin pallatet e banimit. Ka një numër shumë të madh ndërtesash të dëmtuara, pothuajse në çdo lagje”, shkroi shefi i administratës ushtarake të Kievit, Tymur Tkachenko, në Telegram. Ai konfirmoi se sulmet janë kryer me dronë dhe raketa, ndërsa ekipet e shpëtimit janë shpërndarë në disa zona.
Klitschko bëri të ditur se edhe sistemi i ngrohjes së qytetit ka pësuar dëmtime, duke ndërprerë shërbimin në një prej lagjeve, ndërsa paralajmëroi për probleme të tjera të mundshme në furnizimin me energji dhe ujë.
Në rajonin e Kievit, sulmet ruse dëmtuan infrastrukturë kritike dhe banesa private, duke plagosur të paktën një civil, njoftoi kreu rajonal Mykola Kalashnyk. Një 55-vjeçar në qytetin Bila Tserkva u shtrua në spital me djegie termike. Zjarre u raportuan edhe në shtëpi të ndryshme në periferi të kryeqytetit.
Sulmi vjen ndërsa zyrtarët e Bashkimit Evropian paralajmëruan këtë javë se Ukraina duhet të vazhdojë luftën kundër korrupsionit, pas një skandali të madh që ka vënë në pikëpyetje drejtues të lartë të sektorit të energjisë bërthamore. Megjithatë, BE-ja siguroi se mbështetja për Kievin do të vazhdojë, teksa vendi përpiqet të frenojë ofensivën ruse.