Ish-drejtuesi i Harvardit, Larry Summers, ka njoftuar sot më 18 nëntor, se do të tërhiqet nga angazhimet publike, pasi email-et e tij me pedofilin Jeffrey Epstein u bënë publike.
Në një deklaratë, Summers tha se është “thellësisht i turpëruar” dhe pranoi përgjegjësinë për komunikimin e vazhdueshëm me Epsteinin.
Dokumentet e publikuara nga Kongresi tregojnë se ai ka shkëmbyer email-e me Epsteinin deri një ditë para arrestimit të tij në vitin 2019. Ligjvënësit amerikanë pritet të votojnë për publikimin e të gjitha dosjeve të Epsteinit.
Departamenti i Drejtësisë ka hapur një hetim mbi lidhjet e Epsteinit me Bill Clinton dhe figura të tjera të larta demokrate, pas presionit nga presidenti Trump. Clinton ka mohuar kategorikisht të ketë pasur dijeni për krimet e Epsteinit, raporton BBC.
Summers, i cili ka shërbyer si Sekretar i Thesarit nën administratën Clinton dhe këshilltar ekonomik i Obamës, tha se do të fokusohet në rikthimin e besimit te njerëzit pranë tij.
Qendra për Progres Amerikan njoftoi se Summers nuk është më pjesë e saj. Ai vazhdon të jetë në bordin e OpenAI, megjithëse ende nuk dihet nëse do të mbetet në këtë pozicion.