Bashkia e Matit ka nisur dëgjesat publike në kuadër të hartimit të projekt-buxhetit dhe paketës fiskale për vitin 2026. Ndalesa e parë e drejtuesve dhe specialistëve të financës dhe taksave vendore ishte në Njësinë Administrative Macukull. Në këtë takim morën pjesë edhe deputeti Agron Malaj dhe kryetari i zgjedhur i Bashkisë Mat, Altin Bojni.
Kryetari në detyrë i Bashkisë Mat, Myslim Zeneli, paraqiti prioritetet e bashkisë për vitin e ardhshëm për këtë njësi administrative, duke theksuar përmirësimin e infrastrukturës rrugore me vijimin e asfaltimit të rrugës kryesore, furnizimin me ujë të pijshëm, si edhe rritjen e cilësisë së shërbimeve në arsim dhe shëndetësi. Ai theksoi gjithashtu se paketa fiskale për vitin 2026 do të mbetet e pandryshuar, njësoj si ajo e vitit të kaluar.
Më pas, dëgjesa publike vijoi në Njësinë Administrative Derjan, ku Zeneli paraqiti sërish prioritetet e bashkisë për vitin e ardhshëm. Banorët e pranishëm shprehën kërkesat e tyre dhe kërkuan që zgjidhja e problemeve të reflektohet në buxhetin e vitit 2026.