Prokurori i Përgjthshëm, Olsian Çela dhe drejtuesi i Prokurorisë së Posaçme (SPAK) Altin Dumani dhe përfaqësues të tjerë të këtyre prokurorive kanë zhvilluar një vizitë zyrtare në Belgjikë në datat 18–19 nëntor, ku u takuan me Prokuroren e Përgjithshme Federale të Belgjikës, Ann Fransen. Në delegacion morën pjesë edhe përfaqësues të tjerë të të dy institucioneve.
Takimi u organizua në kuadër të marrëveshjeve të bashkëpunimit të nënshkruara mes palëve dhe si vijim i takimeve të zhvilluara një vit më parë në Tiranë.
Sipas një njoftimi nga Prokuroria e Përgjithshme, diskutimet u fokusuan te bashkëpunimi në luftën kundër krimit të organizuar, hetimet financiare, pastrimi i produkteve të veprës penale, përdorimi i kriptomonedhave në aktivitete kriminale, koordinimi i hetimeve dhe krijimi i skuadrave të përbashkëta hetimore. Po ashtu, u trajtuan çështje që lidhen me ndihmën juridike ndërkombëtare, përfshirë ekzekutimin e vendimeve penale dhe letërporosive.
Të gjithë pjesëmarrësit në këtë takim vlerësuan shumë pozitivisht bashkëpunimin e deritanishëm dhe nënvizuan rëndësinë për zgjerimin e mëtejshëm të tij përmes shkëmbimit më të gjerë të informacioneve, me qëllim hetimin e plotë të aktiviteteve kriminale që prekin të dy vendet.
Gjatë bisedimeve u diskutua gjithashtu për nevojën e përmirësimit të kuadrit ligjor dhe rritjes së efikasitetit në zbatimin e legjislacionit antimafia, duke synuar rritjen e kapaciteteve për sekuestrimin dhe konfiskimin e aseteve kriminale të subjekteve të hetuara ose të dënuara në Shqipëri dhe Belgjikë.