Situata në selinë blu nuk është e qetë, me një lëvizje që ka nisur të zërë rrënjë. Ish-deputeti Edmond Spaho thotë se partia ka nevojë për ndryshim thelbësor, njerëz të rinj dhe veçanërisht zgjedhje të ndershme. Në një postim në rrjete sociale, përmes të cilit nuk kursen sulmin ndaj Ervin Salianjit për Foltoren që do të nisë sot nga Durrësi, ai shprehet se Berisha e meriton një tip të tillë, pasi e bëri hero dhe e tani i kthehet kundër.
“Nuk kam asgjë kundër me lëvizjen në vetvete. PD ka nevojë për mendim të ri, njerëz të rinj, për ndryshim thelbësor dhe veçanërisht zgjedhje të ndershme e të pamanipuluara. Vetëm kështu mund të hapë kapitull të ri dhe të ribëhet shpresë për vendin. Por kur shoh se kush po bëhet simbol i ndryshimit më vjen të qesh. Mjeshtri i piruetave, i mashtrimit dhe i shkopit të bejzbollit. Doktori e meriton këtë tip. Ra nga shiu në breshër. E mori dhe e bëri hero, për pak Kryetar të Grupit Parlamentar.
Për shkak të kushteve që ky individ i vuri, larguan mbështetesit e Foltores dhe ngritën këtë në piedestal. I kthehem prapë çështjes së ndryshimit. PD ka nevojë për qilizëm dhe jo për foltorje të reja kur e para ngeli rrugëve, jo për protesta simbolike apo lëvizje “për ndryshim” motivuar nga interesa personale e meskine. Gjithçka po ndodh nuk është veçse sezon i ri, avaz i vjetër. Veçanërisht kur sheh se cilët po udhëheqin “përpjekjet” për ndryshim”, ka shkruar ai.