Presidenti i PL-së, Ilir Meta ka kërkuar që të mos futet në kafaz metalik gjatë seanca gjyqësore. Kërkesa është depozituar sot në GJKKO përmes avokatit të tij Kujtim Cakrani, në të cilën kërkon që të jetë në sallën e gjyqit pranë mbrojtësve të tij pa barriera fizike, dhe në përputhje me të drejtën e mbrojtjes efektive.
Ai argumenton se mbajtja e tij në kafaz shkel të drejtat kushtetuese si edhe nenin 3 të Konventës Evropiane për të Drejtat e Njeriut. Sipas tij, kjo praktikë përbën një formë trajtimi degradues dhe poshtërues. Deri në heqjen e kësaj mase, në kërkesë thuhet se nuk do të zhvillojnë seancat gjyqësore.
“Si e tillë, kjo praktikë duhet menjëherë të ndërritet dhe i pandehuri duhet të trajtohet me dinjitet dhe sipas standarteve të procesit të rregullt ligjor. Derisa të merren masat që kjo shkelje e dinjitetit njerëzor vendosur me qëllim poshtërues të hiqet, ne nuk do të zhvillojmë seanca gjyqësore. Besojmë dhe shpresojmë se do merren masa për rikthimin e normalitetit dhe gjykimi të vazhdojë sipas standartit të prezumimit të pafajësisë dhe dinjitetit njerëzor”, thuhet në kërkesë.
