Të dhënat preliminare të publikuara nga Komisioni Qendror i Zgjedhjeve (KQZ) në Kosovë tregojnë se partitë opozitare kanë mbetur dukshëm mbrapa në zgjedhjet e fundit që u zhvilluan dje, 28 dhjetor 2025.
Krejtësisht ndryshe paraqitet situata për Lëvizjen Vetëvendosje (VV), e cila ka arritur një fitore bindëse.
Sipas rezultateve paraprake, Vetëvendosje ka siguruar 49.30% të votave dhe pritet të fitojë 56 mandate në Kuvendin e Kosovës. Partia Demokratike e Kosovës (PDK) renditet e dyta me 21.01% të votave, që përkthehen në 23 deputetë, ndërsa Lidhja Demokratike e Kosovës (LDK) ka marrë 13.59% dhe pritet të ketë 15 deputetë.
Aleanca për Ardhmërinë e Kosovës (AAK) ka arritur 5.68% të votave dhe pritet të sigurojë 6 ulëse në Kuvend. Ndërkohë, Nisma Socialdemokrate, me vetëm 1.72% të votave, nuk ka arritur ta kalojë pragun zgjedhor dhe mbetet jashtë Kuvendit.
Lista Serbe, partia më e madhe e komunitetit serb në Kosovë, ka marrë 4.74% të votave, ndërsa mbetet të shihet se si do të shpërndahen mandatet e rezervuara për komunitetet jo-shumicë.
Megjithatë, mbetet të konfirmohet metodologjia përfundimtare e shpërndarjes së mandateve, përfshirë nëse do të llogariten të gjitha 120 ulëset apo vetëm ato të përgjithshme.
Si funksionon shpërndarja e mandateve?
100 ulëse janë mandate të përgjithshme dhe shpërndahen sipas përqindjes së votave që marrin partitë në zgjedhje.
20 ulëse janë të rezervuara për komunitetet jo-shumicë, pavarësisht rezultatit zgjedhor:
-10 për komunitetin serb
-10 për komunitetet e tjera (boshnjakë, turq, romë, ashkali, egjiptianë, goranë)
Të dielën, qytetarët e Kosovës iu drejtuan kutive të votimit në numër më të lartë se gjatë procesit zgjedhor të zhvilluar në shkurt të po këtij viti. Numri total i atyre që shprehën vullnetin e tyre politik ishte 900 330 qytetarë, nga 1 999 204 që është numri i votuesve në listë.
Pjesëmarrja në zgjedhje ishte 45.03%, ndërsa janë procesuar 2 538 nga 2 557 vendvotime, ose 99.26% e tyre.