Një person humbi jetën nga moti i keq në Durrës. Astrit Hysenaj u gjet i mbytur në një kanal. Ai banonte në fshatin Arapaj teksa ishte edhe punonjës i Ndërmarrjes së Komunales.
Familjarët e tij shprehen se Hysenaj humbi jetën në krye të detyrës. Sipas tyre, ai ishte duke pastruar autostradën pranë kanalit, kur u rrëmbye nga rrjedha e fortë e ujit.
Familjarët kërkojnë që ngjarja të njihet zyrtarisht si humbje jete në krye të detyrës dhe të faktohet se, në momentin kur u rrëmbye nga uji, ai ishte në punë.
“Familjarët kërkojnë që ky ka rënë në krye të detyrës, pasi sipas pamjeve tona deri në 08:25 ka qenë duke punuar. Ato që i takojnë sipas ligjit. Ne mendojmë atëherë ka qenë momenti që është zhdukur. Nëse ndonjë ka pamje të kundërta le të na e vërë në dispozicion që ka qenë duke ikur në shtëpi, ose ka qenë këtu. Ato që kemi ne, ai ka qenë duke punuar”, tha djali i xhaxhait të tij, O. Hysenaj.
Familjarët kanë publikuar edhe një video me celular nga vendi ku rezulton se Hysenajn e ka marrë rrjedha.
Viktima la pas nënën 85-vjeçare, bashkëshorten dhe një djalë.
“Kanë ngelur vetëm me pensionin e nënës”,tha i afërmi.