Kryeministri Edi Rama reagoi sot publikisht ndaj një komenti të bërë nga një gazetar, i cili sipas tij, ka dezinformuar qytetarët lidhur me çështjen e mbetjeve plastike dhe inceneratorin e Tiranës.
Në reagimin e tij, Rama thekson shqetësimin për rritjen e dezinformimit në hapësirën mediatike dhe mungesën e përgjegjësisë profesionale në një pjesë të gazetarisë.
“Komentatori-torja është gazetar-tare të cili-cilës ia hoqa emrin se nuk më intereson asfare polemika personale, po fakti skandaloz që një zëdhënës-nëse e opinionit publik, me një injorancë të ububushme (nuk flas për etikën apo për shqipshkrimin se pastaj i bie të rritet shumë kërkesa) u thotë qytetarëve se inceneratori i Tiranës e ka fajin për shishet e qeset plastike që hidhen rrugëve të Shqipërisë, e që me erën e pastaj me ujërat e lumenjve bëhen kapica të jashtëzakonshme e zbresin e bllokojnë rregullisht grykërrjedhjet e kanaleve kullues apo ndotin plazhet e detet…”, shkruan Rama
Normalisht, vijon kreu i qeverisë, “një gazetar nuk urren, nuk shpif, nuk dezinformon, po lexon, informohet dhe informon, por fatkeqësisht lloji i parë shtohet e shtohet (tamam si prurjet e plastikës) në kanalet e informimit, ndërsa lloji i dytë pakësohet dhe publiku përmbytet përditë nga prurjet e urrejtjes, shpifjes e dezinformimit!”.
Kryeministri shprehet se të urresh, shpifësh, dezinformosh është kollaj ndërsa e kundërta, ka punë e mund të madh.
“Kollaj, të urresh, shpifësh, dezinformosh është kollaj, sepse nuk ka nevojë të lexosh, të mësosh, të kuptosh të vërtetën e të jesh i drejtë dhe i mirëartikuluar, ndërsa e kundërta, uh, e kundërta ka punë e mund të madh”, thekson Rama.
