Pas zgjedhjes së Altin Bojnit në detyrën e Kryetarit të Bashkisë Mat në zgjedhjet e pjesshme lokale të mbajtura në nëntor të vitit të kaluar, posti i Kryetarit të Këshillit Bashkiak mbeti vakant, pasi mbahej më parë nga vetë Bojni.
Këtë të hënë, Këshilli Bashkiak Mat zhvilloi mbledhjen për zgjedhjen e drejtuesit të ri. Emri i vetëm i propozuar për këtë post ishte ai i Anila Stafasanit, e cila deri më tani ushtronte funksionin e nënkryetares së Këshillit.
Në fletën e votimit nuk u paraqit asnjë kandidat tjetër, ndërsa anëtarët e pranishëm të Këshillit Bashkiak votuan me 15 vota pro dhe një votë të pavlefshme, duke zgjedhur Anila Stafasanin Kryetare të Këshillit Bashkiak Mat deri në përfundim të mandatit në vitin 2027.
Si pasojë e kësaj zgjedhjeje, posti i nënkryetarit të Këshillit mbeti vakant. Për këtë pozicion u propozua anëtari i Këshillit Bashkiak, Jetnor Hoxha, i cili u zgjodh me të njëjtin numër votash si kryetarja e sapozgjedhur. Si Anila Stafasani, ashtu edhe nënkryetari Jetnor Hoxha, janë me profesion mësues.
Gjithashtu, gjatë kësaj mbledhjeje u plotësuan edhe vakancat në komisionet e Këshillit Bashkiak Mat, të krijuara pas zgjedhjes së Altin Bojnit në krye të Bashkisë.
